A SETTERDAY AIFTERNEEN AT KEITH FC
It’s Setterday – it’s 2.15
The fans troop intae Kynoch Park
Hopin’ tae see a victory
So they kin leave - happy as a lark
The Stadium sits in Balloch Road
They ca’ it the “Field o’ Dreams”
The P.A. System crackles
Time tae announce the teams
The Maroons come trottin’ oot
Seen be the start of the game
The ref he blaws his fussle
Iviry wik it is the same
The Captain he won the toss
We’re kickin towards the Balloch Hill
The opposition they keep on tacklin’
O’ them we’ve hid oor fill
We’re playin’ weel – lookin’ good
A feelin’ that we micht score
Sure enuff – the ba’ hits the net
The Howlin’ Shed gies a michty roar
The P.A System springs tae life again
Oot blasts “Chelsea Dagger”
The name o’ the scorer is then roared oot
We’re aheed – so we kin swagger
We’re pilin’ it on – an’ weel on tap
Nae surprise fin we score again
The veesitors are strugglin’ tae cope
Oor strikers are drivin’ them insane
The Maroons are gweed tae watch
‘Specially fin they’re playin’ weel
Pingin’ the ba’ a’ aboot
Boy, they’re fairly the real deal
We’ve got them on toast an’ nabbed anither
Cripes, we’re fairly coastin’
They canna keep up wi’ us
It’s a fact – we’re nae jist boastin’
Bit noo it’s half-time
We heed for a cuppa an’ a pie
The same in the second half wid be fine
That’s the truth – we canna lie
The Ref blaws the second half aff
The Balloch Road eynd it beckons
Kin we score some mair?
Hopefully a fyow – abiddy reckons
A breeze gets up aroon’ the grun’
The Championship flag furls roon’
The Maroons are pressin’ on an’ on
Fairly getting’ the veesitors doon
We’re in full flow, dominatin’
An’ at wir very peak
The ingin bag is bulged again
The ither team is oh sae seeck
It’s lookin’ gweed – it’s lookin’ great
The game is a’ bit won
We are hivvin’ a pairty
Supportin’ the Maroons is sic great fun
The game hiz only seconds left
The ref’s awa tae blaw his peeper
Fin oor centre he let’s fly
An’ skelps a shot richt by their ‘keeper
Time’s up – it’s in the bag
Fae the Stand – a michty cheer
The Howlin’ Shed is rockin’
There’s naebiddy gies us the fear
The Main Gates they swing open
We gaung oot full o’ the joys
Celebratin’ anither great win
Bi thon super Maroon boys
Aye, its great gaun tae Kynoch Park
On a Setterday aifterneen
Waatchin the lads in Maroon
KEITH FC – THE BEST YE’VE IVIR SEEN!
Poem by Charlie Simpson