THE SCOURGE OF HAMILTON ACCIES 1980 AN’ A’ THAT
They said we cwidna’ dee it
They said we hid nae chance
Bit on the 26th January 1980
We led Hamilton Accies a merry dance
Bobby Wilson wiz the manager
As a gaffer he wiz supreme
He’d moulded a han’ fae o’ stars
That made up that great Keith FC Team
Threave Rovers were swept aside
In the Scottish Cup second roon’
Then, a nicht at Dunblane Hydro wiz spent
Heedin’ for Douglas Park on the wye doon
Davie McParland wiz gaffer at Accies
In the First Division they were flyin’high
They thocht it wid be easy peasy
Bit for them – weel, the eynd wiz nigh
There wiz sarcasm in the match prog
“52 bade at the luxurious Hydro – How very nice!”
Readin’ it raither irked us
The boys’ll mak’ them pey the price
The same mag also spouted forth
We hidna’ met a team o’ that calibre afore
That wound us up even mair
We’d mak’ them feel o’ sae sore
The ref he blew his peeper
Tae set oor game o’ destiny aff
We were wary for a filie
O’ deein’ wrang in that first half
Bit then as time gaed on
Oor confidence it grew
They lookit a bittie feart
Five meenits fae half-time – we made the brakthrough
The Deadly Duo – O’Hara and Bremner
Combined – Kevin lookit a’ set
The ba’ broke – in pounced Colin Keir
Fired fae 15 yards intae the Accies net
Then, an ‘oor on the clock it said
Colin’s corner flickit on by Kevin, Number Nine
Saw wee Raymond “Ace” O’Hara
Swivel, an’ fire the ba’ ower the line
Maroons fans were celebratin’
Accies diehards deep holes they were a’ diggin
Fin “Foggie Fury” Kevin Bremner
Let fussle fae 20 yards, nearly tore the net fae the riggin’
3-0 up! - Jings, ye’d better believe it
Ah – bit wiz there a sting in the tail?
Twa flukey goals in the last five meenits
Hid us in the Stand, turnin’ o’ sae pale
The mist wiz comin’ doon
Wiz this nae gaun tae be oor day?
Bit a string o’ stupendous saves
Wiz made by the peerless Bobby Gray
Aye, their “ghast” wiz fairly “flabbered”
Accies were dumpit oot
O’ the Scottish Cup Third Roon’
Maroon Heroes a’ – o’ that there is nae doot
Cup-tie, Skipper, Dally an’ Big Eck
In front o’ the imperious Bob
Defendin’ lik’ tigers, tacklin’ an’ growlin’
Deein’ o’ sic a marvellous job
In midfield, Louis Duncan chased an’ harried
Powerhoose Andy Fettes nivir gaed an inch
Wi’ goal hero Colin helpin’ oot
A hame win wiz nivir a cinch
John Curran junior – a man o’ mony positions
Wiz here there an’ iviry where
File – subbies Dennis Bruce an’ Neily Rodger
Made sure Accies were driven tae despair
Of coorse – “Ace” O’Hara an’ “Turbo charged” Bremner
Did fit they dee best
Lookin’ alert, scorin’ goals
Nae geein’ the hame defence ony rest
They cam’ - they sa’ - they conquered
Wilson’s Warriors cam’ through the mist wi’ a victory
Left Hamilton completely befuddled
GREATEST SCOTTISH CUP WIN IN KEITH FC’S HISTORY!
© Charlie Simpson