Sno' Eese for the Maroons!

Fin I wiz sma’ an’ growin’ up
Sic fun I hid wi’ the sna’
Bit noo a fyow ‘eers on the clock
It spiles ma game o’ fitba

Jist fin I thocht we’d get ti play
The fite stuff cam’ dingin’ doon
Covered the Field o’ Dreams lik’ a blanket
Man, ma heid wiz spinnin’ roon

It’s been affa stop an’ start
Caa’sin sic a lot  o’ pain
Files, ye think it’s safe eneuch
Ithers – “Fan’ll we play again”?

Back in the day o’ course
We’ve hid Hamilton, East Stirling an’ Cowdenbeath
Makkin’ a wintry Scottish Cup journey
Up North ti play the Michty Keith!

Volunteers they a’ turned up
An’ dug in a’ thegither
Deein’ their bittie ti mak’ sure
The game cwid beat the wither

Noo, ah’ve deen ma share o’ swypin’
Used a Breem, a Shovel, an’ a Spad’
A’ fer the sake o’ the fitba
Lotsa fowk think ah’m fair mad

Eence the sna’ wiz cleared
An’ coloured lines lookin’ affa bra’
Abiddy rarin’ ti play
Usin’ a bricht orange ba’

Maist o’ the time tho’
There’s nithin’ ye kin dee
As the sna’ starts flakin’ doon
Fitiver will be will be

It’s really affa frustratin’
Fin a’ is said an’ deen
If we canna get wir game
On a Setterday Aifterneen

Bad eneuch for us thit watch?
Spare a thocht for big Craig an’ the boys
Faces as lang as Balloch Road
Lik’ bairns withoot their toys

Ach, let’s look on the bricht side
Fer the sna’ will surely melt
An’ eence again at Kynoch Park
We’ll see the Maroons gyang full pelt!

January 2025