A Merry Maroon Christmas

Weel, it’s Christmas Eve

Gey frosty an’ affa dark

Santa on his Sleigh is heedit

Ower The Field o’ Dreams ca’ed Kynoch Park

Gweed diehard Maroons

Tuckit up cozy in bed

Dreamin’ a’ the sweet dreams

Hopin’ their letters Santa hiz read

It’s a’ sae verra quait

Nithin’ stirrin’ nae even a moose

As the reid suited mannie wi’ fite beard

Delivers prezzies tae iviry hoose

“Fit hiv we here?” He speirs

Tae Rudolph the heid reindeer

“A Notie fae Keith gaffer Craig Ewen”

Wintin’ fitba iviry Setterday o’ the ‘eer

Co-skippers Robbo an’ James Brownie

Hiv been Maroons fer sic a lang time

“Santa, fer us tae win a Trophy

Wid jist be affa sublime”

The rest o’ the players a’ thocht

If they wrote a letter thegither

Nae askin’ fer affa muckle

“Please Santa, fitba, fitiver the wither”

Noo, Club Chairman wee Andy

Wiks ago, hung up his Santa Bag

Got his Mam tae write his letter

“Ah’m jist needin’ a championship flag”

Onywye, time wiz gettin’ on

Santa on his Sleigh in tap gear

Wiz sprinklin’ some “magic win dust”

Tae gie Keith fans some festive cheer

The Christmas Tree is sparklin’

Singin’ Carols wi’ Silent Nicht

Decorations a’ hingin’ up

Man, fit a rare sicht

So, noo it’s Christmas Morn

The prezzie papers a’ torn aff

Nae playin’ wi’ the bairns toys?

Ha – Dinna mak’ me laff!

The Turkey’s cookin’ fine

Sproots, Roasters, pigs’n’blankets smellin’ grand

There’s naebiddy’ll “trifle” wi’ us

Kiz, we’re Keith FC, the best Club in the Land!

MERRY CHRISTMAS TAE MAROONS A’  OWER THE WARLD!